Imarsiornermik ilinniartitaanerit pillugit Inatsisartut peqqussutaat nr. 7, 11. november 2000-imeersoq.

 

Inuutissarsiummik ilinniartitsisarnermik Kalaallit-Nunaannut inatsimmi nr. 582-imi, ulloq 29. november 1978-imeersumi § 1, aamma Sunngiffimmi sammisassaqartitsineq pillugu Kalaallit Nunaannut inatsimmi nr. 584-imi, ulloq 29. november 1978-imeersumi § 1 aamma 2 naapertorlugit aalajangersarneqarpoq:

 

Kapitali 1
Ilinniartitaanerit siunertaat aamma atuuffissaat

§ 1. Imarsiornermik ilinniartitaanernik aamma imarsiornermik pikkorissaasarnernik ataatsimut ataqatigiissitanik aaqqissuussanik Naalakkersuisut aaqqissuussissapput, ilinniartitaanerit pikkorissarnerillu taakku imarsiornermi inuiaqatigiillu ineriartorneranni inuussutissarsiornikkut piginnaanerisariaqakkanik piginnaanerisariaqakkanillu nalinginnaasunik naammassinnissapput, aamma ilinniartitaanerit pikkorissartitsisarnerillu nunat tamalaat konventioninut isumaqatigiissutaanullu qaqugukkulluunniit naleqqussagaasimassapput.
Imm. 2. Ilinniartitsinermi periaaseq aamma ima aaqqissuunneqassaaq inuusuttut ilinniagaqarnissaannik kajumilersitsissalluni aamma ilinniagaqartissallugit, inuttut ineriartornerannut pissarsiviusumik aamma siunissami suliffeqarluni inuunissamut tunngavisseeqataasumik taamatullu aamma nunatsinni nunattalu avataani ilinniagaqaqqinnissamut periarfissiisumik.

§ 2. Inatsisartut peqqussutaat sumiissusersiortut, ataatsimoorussatut inuttaasut, aalisartut aamma umiarsuarmi maskiinalerisut ilinniartitaanerannut tamanut atuuppoq.
Imm. 2. Inatsisartut peqqussutaat pikkorissarnernut imarsiornermik attuumassuteqartunut aamma atuuppoq.
Imm. 3. Inatsisartut peqqussutaat inuussutissalerinermik ilinniartitaanernut aamma pikkorissartitsinernut taakkuluunniit ilaannaannut aammattaaq atuuppoq, ilinniartitaanerit pikkorissartitsinerilluunniit siunnerfii imarsiornermik inuutissarsiuteqarnermut sammitinneqarpata.

 

Kapitali 2
Imarsiornermik ilinniartitaanernut tunngasut aqunneqarnerat

§ 3. Naalakkersuisut ilinniartitaanerit pilersinneqarnissaannik atorunnaarsinneqarnerinillu akuersisartuupput.
Imm 2. Naalakkersuisut, imaluunniit Naalakkersuisut tamatumunnga piginnaatitaat, atuarfinni imarsiornermik ilinniartitaanernik ingerlataqartuni ilinniartitsinermik nakkutilliisuussapput, tak. § 2.

§ 4. Imarsiornermik Ilinniarfimmi imarsiornermik ilinniartitaanernut ataatsimiititaliamik pilersitsisoqassaaq, tamatumani ilinniartitaanerit suliamut tunngasunik imaqarnissaat aammalu ilinniakkat ataasiakkaat ilinniakkatigut imaasa aamma pissusissamisoortumik qaffasissuseqarnissaasa qulakkeernissaat pingaarnerutillugu siunertarineqarluni.
Imm. 2. Ilinniartitaanermut ataatsimiititaliaq apeqqutit imarsiornermik ilinniartitaanermut tunngassuteqartut Ilinniartitaanermut Naalakkersuisumit ataatsimiititaliamut saqqummiunneqartut pillugit oqaaseqaateqartassaaq. Ataatsimiititaliaq apeqqutit imarsiornermik ilinniartitaanermut annertuumik allannguuteqarnermik kinguneqartussat pillugit oqaaseqaateqartinneqartassaaq. Ataatsimiititaliap apeqqutit ilinniartitaanermut tunngassuteqartut nammineerluni suliarisinnaavai Naalakkersuisunullu ilaasortamut tamakku pillugit oqaaseqaateqarluni.
Imm. 3. Naalakkersuisut Imarsiornermik Ilinniarfimmi ilinniartitaanermut ataatsimiititaliamut maleruaqqusat aalajangersassavaat, tamatumunnga ilanngullugit toqqaanermut, katitigaanermut, ilaasortat ajunngitsorsiaqartitaanerannut, suleriaasissanut pisinnaatitaaffinnullu tunngassuteqartut.

§ 5. Saviminilerinermik Ilinniarfimmi imarsiornermik ilinniartitaanerit iluanni ilinniartitaanerit pikkorissaasarnerillu ilinniakkatigut imarisaat, pissusissamisoortumillu qaffasissuseqarnissaat saviminilerinermik ilinniartitaanermut ataatsimiititaliamit, inuutissarsiutinut ilinniartitsinerit inuutissarsiutinullu pikkorissartitsisarnerit pillugit Inatsisartut peqqussutaat naapertorlugu pilersinneqartumit, qulakkeerneqassapput.

 

Kapitali 3
Ilinniartitaanerit

Sumiissusersiortut

§ 6. Naalakkersuisut peqqussutaat naapertorlugu umiarsuarni niuffagiutini aalisariutinilu sumiissusersiortut soraarummeernissanut piareersarneq pisassaaq Imarsiornermik Ilinniarfimmi, tassanngaanniillu ilinniartut imarsiortutut soraarummeersinneqarnissaat inassutigineqartassalluni.
Imm. 2. Naalakkersuisut aalajangissavaat ukununnga maleruaqqusat
1) sumiissusersiortutut ilinniartitaanernut Imarsiornermik Ilinniarfimmi ilinniartunngorsinnaati taanissaq,
2) sumiissusersiortut ilinniartinneqarneranni siunertaq killiliussallu, tassunga ilanngullugit ilinniartitaanerit sivisussusissaat, aamma 3) ilinniarnerup naammaginartumik angusaqarluni isigineqarsinnaanissaanut piumasaqaatit.

§ 7. Naalakkersuisut aalajangissavaat sunngiffimmi imaatigut angalasutut misilitsinnissanut soraarummeernissanullu piareersarnermut inassutigineqarsinnaanermut aalajangersakkat.

Inuttat ataatsimoorussaasut

§ 8. Inuttatut ataatsimoorussaasutut ilinniartitaanerit Naalakkersuisut aalajangiinerisigut ingerlanneqarsinnaapput Imarsiornermik Ilinniarfimmi imaluunniit Saviminilerinermik Ilinniarfimmi.
Imm. 2. Naalakkersuisut aalajangissavaat ukununnga maleruaqqusat
1) inuttatut ataatsimoorussaasutut ilinniartunngornissamut tiguneqarsinnaaneq,
2) inuttat ataatsimoorussaasut ilinniartitaaneranni siunertaq killilius sallu, tassunga ilanngullugit ilinniartitaanerit sivisussusissaat, aamma
3) ilinniarnerup naammaginartumik angusaqarluni naammassineqartutut isigineqarsinnaanissaanut piumasaqaatit.

Aalisartut

§ 9. Aalisartutut ilinniartitaanerit pisassapput Imarsiornermik Ilinniarfimmi.
Imm. 2. Naalakkersuisut aalajangissavaat ukununnga maleruaqqusat
1) aalisartutut ilinniartunngornissamut tiguneqarsinnaanissaq,
2) aalisartutut ilinniartitaanermi siunertaq killiliussallu, tassunga ilanngullugit ilinniartitaanerit sivisussusissaat, aamma
3) ilinniarnerup naammaginartumik angusaqarluni naammassineqartutut isigineqarsinnaanissaanut piumasaqaatit.

Umiarsuarni maskiinalerisut

§ 10. Umiarsuarni maskiinalerisutut ilinniarneq pisassaaq Saviminilerinermik Ilinniarfimmi.
Imm. 2. Naalakkersuisut aalajangissavaat ukununnga maleruaqqusat
1) umiarsuarni maskiinalerisutut ilinniartunngornissamut tiguneqarsinnaanissaq,
2) umiarsuarni maskiinalerisutut ilinniartitaanermi siunertaq killiliussallu, tassunga ilanngullugit ilinniartitaanerup sivisussusissaa aamma
3) ilinniarnerup naammaginartumik angusaqarluni naammassineqartutut isigineqarsinnaanissaanut piumasaqaatit.

Inuussutissalerinermik ilinniarnerit pikkorissarnerillu

§ 11. Imarsiortutut inuussutissarsiornermut sammitillugu inuussutissalerinermik ilinniarnerit pikkorissarnerillu taakkualuunniit ilaannik ingerlataqarnerit pisassapput Imarsiornermik Ilinniarfimmi.
Imm. 2. Naalakkersuisut aalajangissavaat ukununnga maleruaqqusat
1) inuussutissalerinermik ilinniarnissamut pikkorissarnissanullu tiguneqarsinnaanissaq,
2) inuussutissalerinermik ilinniarnermi pikkorissarnernilu siunertaq killiliussallu, tassunga ilanngullugit ilinniartitaanerit pikkorissarnerillu ataasiakkaat sivisussusissaat, aamma
3) ilinniarnerup pikkorissarnerilluunniit naammaginartumik angusaqarluni naammassineqartutut isigineqarsinnaanissaannut piumasaqaatit.

Ilinniaqqilluni ilinniakkanillu ingerlatseqqilluni pikkorissarnerit

§ 12. Naalakkersuisut qulakkiissavaat umiarsuarni inuttaasut pillugit inatsimmi aalajangersakkat sukkulluunniit atuuttut naapertorlugit umiarsuarni aalajangersimasuni inuttaanissamut pinngitsoorani ilinniagassatut piumasaqaataasunut pikkorissaasarnernik pilersitsisoqarnissaa allatulluunniit iliorluni periarfissiisoqarnissaa.

§ 13. Imarsiornermik Ilinniarfiup akisussaaffigaa imarsiornermut tunngatillugu ilinniaqqinnernik ilinniakkanillu ingerlatseqqilluni pikkorissaasarnerit ingerlanneqartarnissaat.
Imm. 2. Naalakkersuisut aalajangissavaat ukununnga maleruaqqusat
1) pikkorissarnissanut tiguneqarsinnaanissaq,
2) pikkorissaanernik ilinniartitsinermi siunertaq killiliussallu, tassunga ilanngullugit pikkorissarnerit sivisussusissaat, aamma
3) pikkorissarnerit naammaginartumik angusaqarluni naammassineqartutut isigineqarsinnaanissaannut piumasaqaatit.

Misiligummik ilinniartitsineq

§ 14. Naalakkersuisut immikkut ittunik pisoqartillugu misileraanernut atatillugu Inatsisartut peqqussutaat atortinngissinnaavaat.

 

Kapitali 4
Aalajangersakkat assigiinngitsut

§ 15. Ilinniartut pikkorissartullu ilinniarfimmi najugaqarnermik, pikkorissarfimmi najugaqarner mik nalaani aamma umiarsuup sungiusarfiup angalanerini ajoqusersinnaanerannut tunngatillugu sulisilluni ajoqusersinnaanermut sillimmasiisarneq pillugu inatsit taamatut atuuppoq, tassa ajoquserneq pisimappat pissutsini suliffimmut assingusuni ilinniartitsinerup nalaani. Ajoqusernernut tunngatillugu akisussaaffik Namminersornerullutik Oqartussaniippoq.

§ 16. Naalakkersuisut aalajangissavaat ilinniartitaanikkut piumasaqaatit pillugit maleruaqqusat, tassa ilinniarfinni pikkorissarfinnilu Inatsisartut peqqussutaanni matumani pineqartuni ilinniartitsisunut piumasaqaataasartut naapertorlugit. Naalakkersuisut pilersitsisinnaapput akuersissuteqarsinnaallutilluunniit immikkut ittunik pikkorissartitsinissanut, ilinniartitsisut ilinniaqqinnissaannut ilinniakkaminnillu ingerlatseqqinnissaannut naatsorsuussanik.

§ 17. Naalakkersuisut naammagittaalliorsinnaanermut maleruaqqusaliorsinnaapput, tassunga ilanngullugu naammagittaalliuutit pisortaqarfinnut qaffasinnerusunut ingerlateqqinneqarsinnaassanngitsut.

§ 18. Ilinniartitaaneq akeqanngilaq.
Imm. 2. Ilinniarfiit piumasarisinnaavaat atortorissaarutit atortussallu akilerneqarnissaat, taakkulu ilinniartut namminneq pigisarilissavaat.
Imm. 3. Naalakkersuisut maleruaqqusaliorsinnaapput imarsiornermut tunngasutigut ilinniaqqinnernut ilinniakkanillu ingerlatseqqinnernut peqataasut peqataanerminnut akiliuteqarnissaat pillugu.

 

Kapitali 5
Atortuulersinneqarnissaa il.il.

§ 19. Inatsisartut peqqussutaat 1. august 2001 atuutilerpoq. Peqatigitillugu atorunnaarsinneqarput
1) Imarsiornermut tunngasunut soraarummeernerit pillugit inatsit nr. 209, 7. juni 1958-imeersoq,
2) Imarsiornermut ilinniartitaanerit pillugit inatsit nr. 70, 15. maj 1967-imeersoq, kingusinnerusukkut allannguuteqartinneqartoq, 3) Naalagaaffiup umiarsuai imarsiornermut sungiusarfiusut pillugit nalunaarut nr. 501, 22. september 1975-imeersoq,
4) Sumiissusersiornermik ilinniartitsinermi umiarsuaq sungiusarfiusoq pillugu nalunaarut nr. 264, 20. maj 1976-imeersoq aamma 5) Kallallit Nunaanni sumiissusersiortutut ilinniartitaanerit pillugit Namminersornerullutik Oqartussat.nalunarutaat nr. 17, 17. juni 1988-imeersoq.

Namminersornerullutik Oqartussat, ulloq 11. november 2000

Jonathan Motzfeldt

/

Lise Lennert